Наурыз мейрамы аясында «Ertis» музейінде алғаш рет «Сырмақ Time» атты облыстық байқау ұйымдастырылды. Бұл шара ата-бабамыздан мирас болып қалған сырмақ сыру өнерін қайта жаңғыртып, ұлттық қолөнердің құндылығын насихаттауға арналды.
Байқауға Павлодар мен Екібастұз қалаларынан және облыс аудандарынан келген қолөнер шеберлері қатысты. Қатысушылар өздері жасаған сырмақтар мен ұлттық нақыштағы ою-өрнектермен безендірілген бұйымдарын ұсынды. Әр туындыда халқымыздың бай мәдениеті мен ұлттық өнердің терең тамыры көрініс тапты.
Қазылар алқасы ұсынылған жұмыстарды шеберлік деңгейі, ою-өрнектің үйлесімділігі мен көркемдік мәнері бойынша бағалады. Нәтижесінде үздік деп танылған шеберлерге арнайы дипломдар мен сертификаттар табысталды. «Сырмақ Time» байқауы ұлттық өнерге жаңа серпін беріп, өңірдегі қолөнер шеберлеріне шабыт сыйлаған маңызды мәдени оқиға болды. Ұмыт болып бара жатқан сырмақ сыру өнерін жаңғыртып, жастарға үйрету арқылы ата-бабамыздың мұрасын сақтап қалуға үлес қосты.